මගේ සඳ ඔබ උනානම්

මගේ සඳ ඔබ උනානම් වළා මඩළෙන් ඔබ වසා ඉන්නම්
අමෝදය සේ ඔබ හමයි නම් සුළං පොද වී ඔබ සොයා එන්නම්


නුරා මඩලෙන් වැසි දෙනුවන් සරා බැල්මෙන් මුව තෙමී
සඳ එළිය සේ  මෝදුවේ නම්
රෑ අහස සේ පසු පසට වී ඔබ ළගින් ඉන්නම්

නගා මුවදොර නදී ගැයුමන් වයා පන්සිළු රඟ දිදී
වසුදරා සේ ඔබ රඟයි නම්
මේඝයක් සේ  නුඹ ළඟට විත් ඔබ තෙමාලන්නම්

මගේ සඳ ඔබ උනානම්... //

පද රචනය - උෂාන් පෙරේරා

ඔබ ඇවිත් යන්න ඒවි ...!

නැත කිසිදු වචනයක් 
සිත පමණි ඇත්තේ හිරි වැටුණු 
ගල් ගැසුණු හිරි වැටුණු සිතිවිලි 
ලියම් මා කෙසේ 

නිදි සිතත් ඇහැරගෙන 
හැර නොයා සිටින්නේ ඇයිද මන්දා 
මට හුරුයි මේ බොළඳ තනිකම 
හැමදාම තුරුළු කරගෙන සිටි 

අදත් මග බලයි මා 
කාටවත් නොතේරෙයි 
ඒ පෙනෙන සළකුණු 

ඔබ ඇවිත් යන්න ඒවි ...!

සිත පුරා ඇදි පෙම් හැගුම්

සිත පුරා ඇදි පෙම් හැගුම්

ඔය නුරා කැල්මන් යදියි

මා තරම් අවිහින්සක රැයත්

මට වඩා සැනසුම් විදියි

කොපුල් තල මත රැදි සුසුම්

සීත සුළඟට මුසු වෙමින්

උණුහුමක් රැඳී කොපුල් සෙවනක්

හමුවනා තුරු පෙරමන් යදියි

නුවනගෙහි රැඳී නෙත් කැලුම්

නෙත් පියන් තුළ සැගවෙමින්

සිත මැවූ ඒ එකදු  දසුනින්

කිදුරු පෙම් රූරඟ දකියි

- උෂාන් පෙරේරා -

මියුරු ගී ගැයෙනා මේ රාත්‍රිය

මියුරු ගී ගැයෙනා මේ රාත්‍රිය 
ඔබේම වී සිත පාරනවා 
නිදා වැටුණු මගෙ පෑරුණු  නෙත් යුග
එළිය වැටෙන විට දළුලනවා 

ඔබ මා සුව විදි සරසවි අසුනේ    
වත් සුනු සුවදට  රැවටෙනවා
අපෙ ළගින් සිටි පූසි පැටව් ටික 
හැමදාමත් එතනට එනවා 

ඇහැල ගහ යට ඇහැළ මල් පෙති 
සුළගට තවමත් විසිරෙනවා 
අපේ ළගින් හුන් අපේම යාලුවො
අද ඒ මල් පෙති අහුලනවා 

පෙම් බැම්මෙ ලියු අපේම  පෙම් කවි 
අපිටත් නොකියම නොපෙනී යනවා 
ඔබේ මගේ ඒ නොපෙනෙන කවි මත 
තව අලුතෙන් කවි ලියවෙනවා 


- උෂාන් පෙරෙරා - 

සඳ සැගව උන්නා හැමදාමත්

පාලු නිසල බව හදවත පතුලෙන් 
දෝරෙ ගලා හැලෙනා එක මොහොතක 
ඔබ පණක් උන්නා මට මතකයි 
මගෙ හදවත අසලින් - ගිලිහෙන 
ඒ සුසුමන් විඳිමින් 

පුරුදු සෙනෙහස කුරිරු ස්වරයෙන් 
හඬ නගා ගැයෙනා එක මොහොතක 
ඔබ පමණක් උන්නා මට මතකයි 
මගෙ හදවත අසලින් - හැඩුම් දී 
ඒ සෝ රස විඳිමින් 

සඳ නොලද ඒ සියොත් රහසින්
ඉකි ගසා තැවෙනා යම් මොහොතක 
සඳ සැගව උන්නා හැමදාමත් 
කළු වළා අතරින් - නිහඬ වී 
නොපෙනෙනා අයුරින් 

- උෂාන් පෙරේරා -

වසන්තය එනවා සත්තමයි

වසන්තය එනවා සත්තමයි සුහුබුල් සිනා අරන් 
මග ඇරුනු පෙම් සුවඳ දිගේ    
රොන් සුවඳ අරන් නුබෙ දෙතොල දිගේ 
පාර සොයන් ඒවී 
පෙම් වසන්තයක් ඒවී 

ලෝවනීය කැලුමින් තෙමී හද පවන් නන්වයි 
හිම සීත අරණින්  නුබෙ සුවඳ අරන් 
පාර සොයන් ඒවී 
පෙම් වසන්තයක් ඒවී 

ප්‍රේමනීය හැඟුමින් වෙලී  මන දෝරෙ නන්වයි
දලනිදු  පතුලෙන් නුබෙ හීන අරන් 
පාර සොයන් ඒවී 
පෙම් වසන්තයක් ඒවී 

වසන්තය එනවා සත්තමයි සුහුබුල් සිනා අරන් 
මග ඇරුනු පෙම් සුවඳ දිගේ    ...... //

 lyrics by Ushan Pushpakumara Perera

මල් තුහින හේමන්තයේ පෙම් විහඟ

පෙම් සිත් සා මැවූ පිං වත් සිත් දැරූ සංසාර ආරණ්‍යයේ
තුහින පෙති සුව දැරූ ලවන මද මත් කෙරූ මල් තුහින හේමන්තයේ
කමල පෙම් ගී තැනූ කිනුරු සිතුවම් කෙරූ රූ සිරිනි රණ තිසරියේ
පෙමද මදහස යුතූ මහද සිරිසර නැගූ පෙම් විහඟ දෝ බැසගියේ 

ඇසිඩ් වැස්සට තෙමුණු මායාට

අන්ධකාරය ගල් තලාව මත මියදෙද්දි තව මොහොතකින් මේ හැමදෙයක්ම ඉවරවෙලා තියේවි.උබටත් මටත් අපි කවුද කියලවත් මතක නැති වේවි. මග තොටදි හම්බ උනත් තුහ් කියලා කෙල ගහන්න උනත් බැරිකමක් නැහැ. ඒ උනාට මමත් දන්නව බන් මේ කාලකන්නි හදවතට උබ මොහොතකට හරි ආදරය කලා කියලා. මම මෙතනින් ගියාට පස්සෙ උබ මගේ හුස්ම එක පොදියට තුරුලු කරගෙන ජනේලෙන් මන් යනකන් බලන් ඉන්නවා . හැබැයි මන් කියන්නෙ ඔන්න ඔය හුස්ම ටික දාපන් ඔය භූමි තෙල් ලිපට පිච්චිලා යන්න . නැහැග..... එපා ..... එතකොට උබ ඔය භූමි තෙල් ලිපෙන් උබටම ගිනි තියා ගනීවි. එතකොට මගේ හුස්ම වල පණ ඇද ඇද ඉන්න උනුහුම ආයිත් සැරයක් උණුහුම් වෙලා උබේ මුළු ශරීරයම වැලඳ ගනිද්දි උඹ ආයිත් සැරයක් වෙදනාවෙන් කෑ ගහන්න පටන් ගනීවි . ගමට බැහැ මිනී මරුවෙක් වෙන්න.... කමක් නැහැ .......උබට කැමති දෙයක් කරපන් .

සඳ සිල් අරන් සඳ එන්නෙ නැහැ

සඳ  සිල් අරන් සඳ එන්නෙ නැහැ 
නිල් පාට මල් රේණු සිප ගන්න 
ඔබ ඇවිදින් ගිහින් ඔබ එන්නෙ නැහැ 
තනි  වෙච්ච තරු රෑන නොපෙනී ගිහින් 

පින්සාර සිත් එක්ක සන්සාර කවි ලිව්ව 
උම්මාද සිහිනේ  අරගෙන ගිහින් 
දම් පාට හැන්දෑව අරගෙන ගිහින්

මා එක්ක ඔබ උන්නු මුළු රෑ පුරා 
නිදි වරපු සමනල්ලු ඉගිලී ගිහින් 
මකරන්දෙ මල් සුවඳ අරගෙන ගිහින් 

සඳ  සිල් අරන් සඳ එන්නෙ නැහැ ........ // 

- උෂාන් පෙරේරා - 

ඔබ රැගෙන ගිය මගේ ලෝකය

වැහි පබලු යට ජීවිතය ගෙන 
ඔබ සොයා ගිය පාළු ගොම්මන
වැහි අකුණු සැර නොදුටු අදුරට 
ජීවිතය ගෙන විසි කළා 

පාළු වි ගිය මගේ හදවත 
තුරුළු කරගෙන ඉකි බිදින්නට
ඉරි තැලී ගිය මගේ හදවත 
පාළු ගින්නට වියළිලා 

ඔබ රැගෙන ගිය මගේ ලෝකය 
මලානික වූ අදුරු සෙවනැලි 
ගල් ගැසී ඇත අතරමන්  විය 
ඉමක් නොපෙනෙන අන්ධකාරෙක 

මට දැනෙන තරම් මෙතරම්

              ඔය ආදරෙත් පුදුමයි
              මට දැනෙන තරම් මෙතරම්
              සත්තමයි මට දැනෙනවා ඔබ දැනෙනවා 
              හාදුවක් තරම් 


             සීතලත් අරන් එන්න යන්න ඇවිදින් 
             අන්දකාරේ තරු අස්සට 
             සද සිසිලස අරන් එන්න දෝතට 
             නවාතැන් ගමු ආදරෙන් අපි 
             තනි උනු එක තරුවක් යට 

පෙම් කවි සිත

රැයක් පුරා සිත නිමක් නොවූ කවි 

පෙළක් සොයා නිදි වැරුවා

මටත් හොරා නුබ කවි පෙළක් ලියා 

අන් කවක් සොයා එහි තැබුවා 

සිතට දැනෙන මෙ නිම් නැති පාලුව 

සිර කරගෙන මා දින ගැන්නා 

හීන කතන්නදර ගොතා ලියන්නට 

මතක පොතේ පිටු ඉතිරි වෙලා 

ලියන ලියන මෙ අකුරක් ගානේ 

ඔබ දුන් මතකය ලියවෙනවා 

අකුරු මැකී ගිය හිස්තැන් අතරේ 

ඔබේ නමින් ලේ ඉහිරෙනවා 

රැයක් පුරා සිත .... //

( උශාන් පෙරේරා )

මේක මහ වියලුනු හීනයක්

තද සීත කටු  කම්බි 

පොදියක්  අරන් 

ගෙල වට දමා  සිරකරලන්න 

එය  මට සැපකි 

මේ මා  දකින සිහිනෙට වඩා   

මේක  මහ වියලුනු  හීනයක් 

පමා වී හෝ එති

හදවත මැදින්  බේරෙන ආදරේ දහදිය 
දෙපතුල් අරා හිමිහිට බේරී බේරී පියමන් කරයි 
පෙර දින මා වෙලු හසරැල්  පවන් පොඩි
පමා වී හෝ එතියි සිත පෙරමන් බලයි 

නුරා සිත

හදවත ඉරා දෙකුපුල් ඉරා
කඳුළැල් ගලයි මතක හසරැල් මකා
පෙරදා සිනා ඔබ කී කතා 
නුරාව වෙනුවට දුක ලං කළා 

සුභාවිත

පරාජිත හදවත ඔබ පාමුලට කර 
අරාජික විජිතයේ සොහොනකට වී
මලානික පෙම් කවිය ලියනෙම් 
සුභාවිත ප්‍රේමයක් වෙනුවෙන් 

බේරෙනා විට ලේ බිඳක්

 හදවත හිර වෙලා සීතලට
පැලෙන්නට වෙර දරයි වේගයෙන්
තදකරන් හිත විරියෙන්
දරා ගමි මේ වේදනාවන්  

පෙනී පෙනී ලය මතින්
බේරෙනා  විට ලේ බිඳක්
සීරුවෙන් එය පිස දමමි එය 
ඔබේ නෙත් දැවටෙන්නට කලින් 

ඔබ නොමැති අඩ නින්ද ...... !

                             කටු එලිය විහිදිච්ච කටු ලන්දේ

                             පුන් සඳ විතරයි වැව් කන්දේ

                             ඔබ සිත ඇත දැන් තද නින්දේ

                             මා සිත විතරක් අඩ නින්දේ

ග්ලැඩියේටර් ප්‍රේමය

පසෙකලා ඔබ 

මගේ තනි හිත

අරුත් සුන් වු

ග්ලැඩියේටර් ප්‍රේමයට

කෙසේ මුල පුරන්නද

අරුතවත් නොදැන

ඔය ඔබේ 

අහංකාර හිත

රෝගියාට පිළිතුරක්

අහංකාර හදවත යට

උනුහුමට ගලා යන 

රුධිරයට

ආලකම් පුරුදු කලේ 

ඔබ .....

කුමක්නම් කරන්නද ...?

සේලයින් කුරක් පමණි ඇත්තේ

ඔබ හට දෙන්න